 Pwy ydym ni’n eu rheoleiddio?
Dyma restr o’r gweithwyr iechyd proffesiynol yr ydym yn eu rheoleiddio ar hyn o bryd.
Therapyddion y Celfyddydau - Mae therapydd arlunio, cerddoriaeth neu ddrama yn annog pobl i fynegi eu teimladau a’u hemosiynau drwy gelfyddyd, fel peintio a gwneud lluniau, cerddoriaeth neu ddrama.
Gwyddonwyr Biofeddygol - Mae gwyddonydd biofeddygol yn dadansoddi samplau gan gleifion er mwyn darparu data i helpu doctoriaid roi diagnosis ac i drin afiechyd.
Ciropodyddion a Thrinwyr Traed - Mae ciropodydd neu driniwr traed yn cynnig diagnosis ac yn trin anhwyldebau, afiechydon ac anffurfiadau y traed.
Gwyddonydd clinigol - Mae gwyddonydd clinigol yn goruchwylio profion arbenigol ar gyfer rhoi diagnosis a rheoli afiechyd. Maent yn cynghori doctoriaid ar ddefnyddio profion a dehongli data ac maent hefyd yn cynnal gwaith ymchwil er mwyn deall afiechydon a dyfeisio therapïau newydd.
Dietegwyr - Mae dietegydd yn defnyddio gwyddoniaeth maethiad i lunio cynlluniau bwyta ar gyfer cleifion er mwyn trin cyflyrau meddygol. Maent yna’n helpu pobl i ddilyn y cynlluniau hyn. Maent hefyd yn hyrwyddo dewisiadau bwyd iach ymysg unigolion, grwpiau a chymunedau.
Therapyddion galwedigaethol - Mae therapydd galwedigaethol yn defnyddio gweithgareddau penodol i gyfyngu effeithiau anabledd ac i hyrwyddo annibyniaeth ym mhob agwedd ar fywyd dyddiol.
Orthoptwyr - Mae orthoptydd yn arbenigo mewn cynnig diagnosis a thriniaeth ar gyfer problemau gweledol sy’n cynnwys symudiad ac aliniad y llygaid.
Prosthetyddion ac Orthotyddion - Mae prosthetyddion ac orthotyddion yn gyfrifol am bob agwedd ar gyflenwi prosthesis ac orthosis ar gyfer cleifion. Dyfais yw prosthesis sy’n cymryd lle rhan o’r corff sydd ar goll. Dyfais yw orthosis sy’n cael ei ffitio i ran sy’n bodoli o’r corff er mwyn gwella ei weithrediad neu leihau poen.
Parafeddygon - Mae parafeddygon yn darparu gofal a thriniaeth arbenigol ar gyfer cleifion sydd naill ai’n wael iawn, neu wedi’u hanafu. Gallant roi amrywiaeth o gyffuriau a defnyddio technegau llawfeddygol penodol.
Ffisiotherapydd - Mae ffisiotherapyddion yn delio â symudiad a gweithrediad dynol ac yn helpu pobl i gyflawni eu potensial corfforol llawn. Maent yn defnyddio ymagweddau corfforol i hyrwyddo, cynnal ac adfer lles corfforol.
Radiograffwyr - Mae radiograffwyr diagnostig yn cynhyrchu ac yn dehongli delweddau ansawdd uchel o’r corff er mwyn rhoi diagnosis o anafiadau ac afiechydon. Er enghraifft, pelydr-x, sganiau uwchsain neu CT a gynhelir mewn ysbytai. Mae radiograffwyr therapiwtig yn cynllunio a chyflwyno triniaeth drwy ddefnyddio ymbelydredd.
Therapyddion Lleferydd ac Iaith - Mae therapydd lleferydd ac iaith yn asesu, yn trin ac yn helpu atal anawsterau lleferydd, iaith a llyncu. Mae gan bob un o’r proffesiynau uchod o leiaf un teitl proffesiynol sy’n cael ei warchod gan gyfraith. Mae’n drosedd i honni eich bod wedi’ch cofrestru â ni os nad ydych wedi gwneud hynny, neu i ddefnyddio teitl a warchodir nad oes gennych yr hawl i’w ddefnyddio. Byddwn yn erlyn pobl sy’n cyflawni’r troseddau hyn.
Ymarferwyr yr Adran Weithredu |
